မြန်မာစကား ပြောချင်လွန်းလို့
07/10/2008
မြန်မာနိုင်ငံတွင် ဂျပန်များ အုပ်စိုးနေသော ဒုတိယကမ္ဘာစစ် အချိန်ကာလဖြစ်သည်။ မြန်မာနိုင်ငံသို့ ရောက်လာသော ဂျပန်စစ်သားတစ်ဦးသည် မြန်မာစကားအလွန်တတ်ချင်သဖြင့် အမြဲလေ့လာလျက်ရှိသည်။ နေ့စဉ်အရပ်သုံး မြန်မာစကားများကို လေ့လာကျက်မှတ်သည့် အပြင် အိတ်ဆောင်မှတ်စု စာအုပ်ဖြင့်လည်း မြန်မာစကား အသံထွက်များကို ဂျပန်လို ရေးမှတ်ထားလေ့ရှိသည်။
တစ်နေ့တွင် ထိုဂျပန်စစ်သားသည် စက်ဘီးစီးလျက် မြို့ထဲသို့ထွက်လာစဉ် လမ်းလျှောက်လာသော မြန်မာတစ်ယောက်ကို မမျှော်လင့်ဘဲ ဝင်တိုက်မိသည်။ အတိုက်ခံရသူက ဘာမှမဖြစ်သော်လည်း ဂျပန်စစ်သား မှာမူ စက်ဘီးရော လူရော လဲကျသွားသည်။ ထိုအခါ ဂျပန်စစ်သားသည် လဲနေရာမှ ချက်ချင်းထ၍ သူ၏ မှတ်စုစာအုပ်ကို ထုတ်လျက် စာရွက်များကို အပြင်းအထန် လှန်နေသည်။ ကိုရွှေ မြန်မာမှာမူ သူ့ကို ရေးမှတ်သွားပြီး ဖမ်းဆီးတော့မည် ထင်၍ ကြောက်လန့် တုန်လှုပ်နေ၏။
သို့သော် ဂျပန်စစ်သားက သူ၏မှတ်စုစာအုပ်ကို ကြည့်၍ အားရပါးရ အော်လိုက်သံကို ကြားရသောအခါ ကိုရွှေမြန်မာမှာ ရယ်ချင်စိတ်ကို မနည်းချုပ်တည်း ထားရလေ၏။
ဂျပန်စစ်သားက မြန်မာစကား မပီမသဖြင့် အော်လိုက်သည်ကတော့ “အမလေးဗျ” ဟူသတည်း။
0 comments: to “ မြန်မာစကား ပြောချင်လွန်းလို့ ” so far...
Post a Comment